VIVER IN COLÒNIA
Juvenal Dal Castel

Parona, mi vui dirve na roba: I pol rider, ma mi, non go mia vergonha.
Tornemo in drio e ndemo viver in colònia.

Là ghè galine, gatti, rati, cani, pioti, rospi, oche, faraone, bèstie de mato
porchi, boi, cavre su pai potreri, gai che canta e tatu.
Là ghè vedei che ciùcia le tete de'e vache, anaroti, ozei che canta su pa'e capoere, sabià, ciraciore, poiane, corbi, colombi, saracure, e gnambu.
Brespe, ragni pelosi, lagarti e moschini che beca i calcagni.
Stivaloni ai zenòcii par le giralache no becarne su.

Là ghè me pare, me mare, me nona e cognada che fà bon da magnar e n'ocore pagar e vao coi toseti sensa guastar gnancha um teston.
Lori i fà tanta question che ndemo troarli, se ghe portemo presenti, o se ghe imprestemo soldi senza giuro e ricever in truco de formaio e pan.
Su i due tre giorni, i se stufa de noantri, e, i scomìnsia a sufiar, e, noantri ne toca tórsela, prima che i ne tache adrio i cagni.

Là ghè fontane de àqua fresca, farfale que zola, lusariole e, de note, um mùcio de stele, e proemo ciapar barbastrii, ma i ze pi zvelti de noantri.
Cagni cativi, toca mansarli, e anca insegnarghe solche a sbaiarghe adrio ale bèstie, spaventarle e spaurarle, sensa darghe smorsegoni.
Um giorno, doménega, in ciesa gh'era na toseta piena de vergonha e go cognossesto felice la cosa pi bela del mondo.