La Prèdica ai fioi
Juvenal Dal Castel

Insegnarghe el ben ai fioi, n'el tempo de ancoi,
No ze più come na olta. Pol osar, che no i te scolta.
I ga coraio farghe fronta ai so pròpii genitori.
Brute robe! Fà paura! Par segnai del fin del mondo,
Come ga dito el Signor, ntela Santa Scritura.

Fiole, sté mia far le strambe, che vé taio via le gambe!
Disea el pupà e la mama. - Valtri, fioi, fé polito!
Volemo insegnarve 'l drito! Traté suito d'imparar.
No sté mia smentegarve le parole che vé'ò dito.

Podé, anca, ndar a'n baile, su ntel salon de'a ciesa.
Ma, traté de comportarve. Sempre con bele maniere.
Ver rispeto co le tose. Fà vergogna i ciuchetoni.
Brigadori, che alsa la ose, a farse veder valentoni,
L'è parché no i ze mia boni de catarse le morose.

Sé mia bone ingiuvinar cosa ga i omi in testa!
Feve furbe, stupidele, i vien con parole bele,
A menarve veder stele. No sté 'er paura a farghe bruto
No i zé omi de parola., no sté darghe permission.
I vé promete maridarse, e dopo, i vé dà el caron.

Giorn'incoi, quando i se basa, i par fin due vedei.
Resta bruto pai vecioti, pègio ancor pa'i tosatei.
Quel che i fà ntele novele, dopo i fà anca quà in colònia.
Le tose se sgionfa el peto che par fin due culate.
I popini sensa late, i ciuciará del silicone.

Tose brave e bem vestie, cata fàcile el moroso.
N'ocor mia che sia sioro: che sia bon de sparagnar,
Che nol beva, né che'l fume, basta che piasa el laoro,
Sensa vìssio de macogne, sempre ghè um bravo toso.
Felo suito vostro sposo, dentro in ciesa anca in cartòrio.